કમળના નિશાન સામેનું બટન ખેરાલુંમાં દબાવો અને કરંટ ઇટાલીમાં લાગે તેવું કરો: અમિત શાહ

ખેરાલુ: ભાજપાના રાષ્ટ્રીય અધ્ય્ક્ષ અમિતભાઇ શાહે આજરોજ ૧૪ ડીસેમ્બરના રોજ યોજાનારી ગુજરાત વિધાનસભાની ચૂંટણીના ભાજપના ઉમેદવારોના ચૂંટણી પ્રચારાર્થે મધ્ય ગુજરાત અને ઉત્તર ગુજરાતમાં ચાર જાહેર સભાઓને સંબોધન કર્યુ હતું. કડાણાથી પ્રારંભ થયેલી તેમની પ્રચારયાત્રા ખેરાલું પહોચી હતી. ખેરાલુ ભાજપાના ઉમેદવાર ભરતસિંહ ડાભીને જંગી બહુમતીથી વિજયી બનાવવા તેમણે અપીલ કરી હતી.
ભાજપાના રાષ્ટ્રીય અધ્ય્ક્ષ અમિતભાઇ શાહે ખેરાલું ખાતે જંગી જાહેરસભાને સંબોધતાં કહ્યું હતુ કે, ૯ અને ૧૪ ડીસેમ્બરના રોજ ગુજરાતની ૧૮૨ વિધાનસભા બેઠકોની ચૂંટણી પૂરી થશે. ૧૮ ડીસેમ્બરે મતગણતરી થશે અને ભાજપાની ૧૫૦+ બેઠકો સાથેની નવી સરકાર ૨૦ ડીસેમ્બરથી કાર્યરત થઇ જશે. ગુજરાતમાં જ્યારે જ્યારે ચૂંટણીઓ આવે છે ત્યારે કોંગ્રેસને સત્તાના સ્વપ્ન આવે છે. કોંગ્રેસ જુઠ્ઠાણાઓ ફેલાવીને સમાજમાં ભ્રમ ફેલાવે છે. મતગણતરીના દિવસે બપોરે ૧૨.૦૦ કલાકે પરિણામો સ્પ્ષ્ટ થઇ જશે. કોંગ્રેસ જાય છે. ૧૯૯૮, ૨૦૦૨, ૨૦૦૭, ૨૦૧૨ અને ૨૦૧૪ની જેમ ૨૦૧૭માં પણ જનતાજનાર્દન ભાજપાને જીતાડીને કોંગ્રેસને પરાસ્ત કરશે તે સ્પષ્ટ થઇ ગયું છે.
તેઓએ કહ્યું હતુ કે, ઉત્તરપ્રદેશ મહાનગરપાલિકાની ચૂંટણીમાં ભાજપાને મળેલી સફળતાએ કોંગ્રેસને પરિણામ સુધી રાહ જોવાની પળોજણમાંથી મુક્તિ અપાવી દીધી છે. ઉત્તરપ્રદેશની જનતાએ આપેલા પરિણામ એ દેશની જનતાનો મૂડ બતાવે છે. રાહુલ ગાંધી જ્યાં સંસદસભ્ય છે તે અમેઠી મ્યુનિસિપાલીટીમાં ભાજપા જીતી ગયું છે. રાહુલ ગાંધી પોતાના ક્ષેત્રમાં ગયા હોત તો કદાચ તેમની આબરૂં બચી જાત. ‘‘હવેલી લેતાં ઝુંપડી ખોઇ’’ તેવા હાલ કોંગ્રેસ અને રાહુલ ગાંધીના થયા છે.
શાહે કોંગ્રેસને પ્રશ્ન કર્યો હતો કે, તમે ગુજરાતમાં કયા મુદ્દા પર ચૂંટણી લડવા માંગો છો તે સ્પષ્ટ કરો? કોંગ્રેસની નીતિ જ્ઞાતિ-જાતિ વચ્ચે સંઘર્ષ કરાવવાની છે, ગુજરાતને અશાંતિની આગમાં હોમવાની છે, કરફ્યુગ્રસ્ત ગુજરાત બનાવવાની છે. ભાજપા કોંગ્રેસના મનસુબા પાર પાડવા દેશે નહી. ગુજરાતની ૬.૫ કરોડ જનતાજનાર્દનના અમારા પર આશીર્વાદ છે, આ જનતા અમારા મા-બાપ છે, ભગવાન છે. કોંગ્રેસ વડાપ્રધાન નરેન્દ્રભાઇ મોદીને બદનામ કરવાના કારસાઓ રચે છે. આપણા ગુજરાતના ગૌરવને હણવાનો પ્રયાસ કરે છે. સાડા ત્રણ દાયકાના પોતાના શાસનનો હિસાબ આપતા નથી અને સાડા ત્રણ વર્ષનો હિસાબ માંગે છે.
શાહે કહ્યું હતુ કે, દેશમાં ભાજપાની શ્રી નરેન્દ્રભાઇ મોદીના નેતૃત્વમાં સરકાર બની તેને ગુજરાતના કોંગ્રેસના અન્યાયનો ભોગ બનેલા કાર્યોને ત્વરિત ઉકેલવાની દિશામાં કાર્ય કર્યુ. ગુજરાતની જીવાદોરી નર્મદા યોજનાને ૧૩ દિવસમાં મંજુરી આપી. ૧૭ સપ્ટેમ્બર ૨૦૧૭ના રોજ તેમણે નર્મદા યોજનાનું રાષ્ટ્રને લોકાર્પણ કરી ગુજરાતના વર્ષો જુના સ્વપ્નને સાકાર કર્યું. ૮૦૦૦ કરોડની ક્રુડ રોયલ્ટીની પણ તેમણે તાકિદે ચૂકવણી કરી. એઇમ્સ, બુલેટ ટ્રેન, નેશનલ હાઇવેના અનેક પ્રોજેક્ટો, નવી ૩૩ ટ્રેન સહિતના અનેક ગુજરાત હિતલક્ષી નિર્ણયો કેન્દ્રની ભાજપા સરકારે કર્યા. કેન્દ્રની ૧૦ વર્ષની યુપીએની સરકારે માત્રને માત્ર ગુજરાતને અન્યાય, શાસનમાં અવરોધ, વિકાસના કાર્યોનો વિરોધ કર્યો હતો. ગુજરાતની જનતા આ બધું જ જાણે છે.
દેશમાં ભાજપાની વડાપ્રધાન નરેન્દ્રભાઇ મોદીના નેતૃત્વમાં બનેલી સરકારે ૧૦૬ જેટલી વિકાસલક્ષી યોજનાઓ અમલમાં મુકી છે. દેશમાં ૨૦૧૪ પછી યોજાયેલી ચૂંટણીઓમાં આવેલા પરિણામો અંગેની વાત કરતા કહ્યું હતુ કે,
મહારાષ્ટ્રમાં ચૂંટણી આવી,ભાજપા આવી… કોંગ્રેસ ગઇ…
હરિયાણામાં ચૂંટણી આવી, ભાજપા આવી… કોંગ્રેસ ગઇ…
ઝારખંડમાં ચૂંટણી આવી, ભાજપા આવી… કોંગ્રેસ ગઇ…
જમ્મુ કશ્મીરમાં ચૂંટણી આવી, ભાજપા આવી… કોંગ્રેસ ગઇ…
મણીપુરમાં ચૂંટણી આવી, ભાજપા આવી… કોંગ્રેસ ગઇ…
ગોવામાં ચૂંટણી આવી, ભાજપા આવી… કોંગ્રેસ ગઇ…
ઉત્તરાખંડમાં ચૂંટણી આવી, ભાજપા આવી… કોંગ્રેસ ગઇ…
ઉત્તરપ્રદેશમાં ચૂંટણી આવી, ભાજપા આવી… કોંગ્રેસ ગઇ…
આગામી ૯ અને ૧૪ ડીસેમ્બરે ગુજરાતમાં મતદાન થવાનું છે. ગુજરાતમાં ભાજપાનું સત્તામાં પુનરાવર્તન થવાનું નક્કી જ છે.
શાહે કહ્યું હતુ કે, ગુજરાતના ગૌરવ વડાપ્રધાન નરેન્દ્રભાઇ મોદીના હાથ મજબૂત કરવા કમળના સામેનું બટન ખેરાલુંમા દબાવો અને કરંટ ઇટાલીમાં લાગે તેવું કરો. ગુજરાતનો છોકરો આગળ વધે છે તે કોંગ્રેસના પેટમાં ખૂંચે છે. ભાજપાની લડાઇ વિકાસવાદ સામે જાતિવાદ અને વંશવાદની છે.
આજરોજ ખેરાલું ખાતે યોજાયેલી જંગી જાહેરસભામાં કેન્દ્રીય મંત્રી પી.પી.ચૌધરી, ઉમેદવાર ભરતસિંહ ડાભી, ભાજપાના પ્રભારી જગદીશભાઇ પટેલ, ભાજપાના પ્રમુખ નીતિનભાઇ પટેલ, ભાજપાના અગ્રણી નેતા વિપુલભાઇ ચૌધરી સહિત અનેક આગેવાનો ઉપસ્થિત રહ્યા હતા.

error: Content is protected !!