આયોગ અને પંચની રચના સહિતના આજે કેબીનેટમાં લેવાયેલા નિર્ણયો અંગે ગુજરાત સરકાર દ્વારા પ્રસિદ્ધ અધિકૃત યાદી

ગાંધીનગર: રાજ્ય સરકારે પાટીદાર સમાજના સર્વાંગી વિકાસ માટે તેમજ આર્થિક રીતે સહાયરૂપ થવા ‘બિન અનામત વર્ગ શૈક્ષણિક અને આર્થિક વિકાસ આયોગ’ ની રચના કરવાનો રાજ્ય મંત્રી મંડળની બેઠકમાં મહત્વનો નિર્ણય કર્યો છે, એમ નાયબ મુખ્યમંત્રી નીતિનભાઇ પટેલે કહ્યું હતું. આ આયોગ હેઠળ વિદ્યાર્થીઓને શૈક્ષણિક સહાય તેમજ યુવાનોને સ્વરોજગારી માટે પણ સહાય અપાશે.

ગાંધીનગર ખાતે મુખ્યમંત્રી વિજયભાઇ રૂપાણીના અધ્યક્ષસ્થાને મળેલ રાજ્ય મંત્રી મંડળની બેઠકમાં મુખ્યમંત્રીએ પાટીદાર સમાજ માટે લીધેલા નિર્ણયને આવકારતાં નાયબ મુખ્યમંત્રીએ ઉમેર્યું હતું કે, મંગળવારે પાટીદાર સમાજ સાથે સૌહાર્દપૂર્ણ વાતાવરણમાં ચર્ચા થયા બાદ પાટીદાર સમાજ દ્વારા જે મુખ્યત્વે માંગણીઓ રજૂ થઇ હતી તેનો અમલ કરવા રાજ્ય સરકાર વતી મેં બાંહેધરી આપી હતી, જેને સમગ્ર સમાજે આવકાર્યો છે. આ માંગણીઓ બુધવારે કેબીનેટની બેઠકમાં રજૂ કરાતાં કેબીનેટ દ્વારા પણ આ નિર્ણયોને બહાલી આપવામાં આવી છે.

નાયબ મુખ્યમંત્રીએ ઉમેર્યું હતું કે, આ આયોગ દ્વારા બિન અનામત વર્ગના વિદ્યાર્થીઓ અને યુવાનોને સહાયરૂપ થવા શૈક્ષણિક રીતે સહાય, વિદેશમાં અભ્યાસ લોન માટે સહાય તેમજ ખેતી માટે વિવિધ સહાય તથા ઓછા વ્યાજની લોન પણ આપવામાં આવશે. એટલું જ નહીં, વ્યવસાય, ખેતી, રોજગારી, વાહન ખરીદી જેવા કિસ્સાઓમાં પણ ઓછા વ્યાજની લોન જેવી સવલતો આયોગ દ્વારા અપાશે. તેમજ રાજ્ય સરકારની સબસીડી મળવાપાત્ર યોજનાઓના લાભ પણ બિન અનામત જ્ઞાતિને અપાશે. ઉપરાંત રાજ્યમાં એક રૂપતા જળવાઇ રહે તે માટે પાટીદાર સમાજની સાથે અન્ય સમાજ પણ સમૃદ્ધ થાય તે માટે જો સરકાર સમક્ષ દરખાસ્ત કરવાની થતી હોય તો તેના માટે કાયદાકીય જોગવાઇ મુજબ નવું નિગમ બનાવવા માટે પણ સરકાર વિચારશે અને આ બન્ને બોડી સ્વતંત્ર રીતે કામ કરશે તેને પણ કેબીનેટે મંજુરી આપી છે. રાજ્ય સરકારની વિવિધ યોજનાઓના લાભો તમામ પરિવારો સુધી પહોંચે તે માટે રાજ્ય સરકાર અને આયોગ ચોક્કસ મદદરૂપ બનશે, તેમ તેમણે ઉમેર્યું હતું.

પાટીદાર આંદોલન સમયે પોલીસદમન અંગે તપાસ કરવા માટે હાઇકોર્ટના નિવૃત્ત જજના અધ્યક્ષે પંચ રચવા માટેના નિર્ણયને પણ કેબીનેટે મંજૂરી આપી છે, તેમ જણાવી નાયબ મુખ્યમંત્રીએ કહ્યું કે, આ બનાવો અંગેની નાગરિકોની ફરિયાદો હશે તેની તપાસ પણ નિવૃત્ત હાઇકોર્ટના જજ દ્વારા કરાશે. સાથે સાથે આંદોલન દરમિયાન જે કેસો થયા છે તે કેસો પાછા ખેંચવાની સત્તા રાજ્ય સરકાર હસ્તક છે તે તમામ કેસો પણ રાજ્ય સરકાર દ્વારા પાછા ખેંચવામાં આવશે. તે માટે ગૃહ અને કાયદા વિભાગના પરામર્શમાં રહી યોગ્ય કાર્યવાહી કરવા મુખ્યસચિવ અને ગૃહ  સચિવને સૂચનાઓ આપી દેવામાં આવી છે. જે કેસો સત્વરે પાછા ખેંચાશે, તેમ તેમણે ઉમેર્યું હતું.

નાયબ મુખ્યમંત્રીએ ઉમેર્યું હતું કે, ખેડૂતોના હિતને વરેલી રાજ્ય સરકારે ખેડૂતો માટે વધુ એક મહત્વનો નિર્ણય આજે કર્યો છે. જેમાં ખેડૂતોના ઉભા પાકોને ભુંડ અને રોઝ દ્વારા નૂકશાન કરાતું હતું તેને મદદરૂપ થવા માટે રાજ્ય સરકારે કાંટાળા તારનીવાડ બનાવવા માટે રૂ.૭૦૦ કરોડની સહાયની યોજના છે. આ યોજના હેઠળ ખેડૂતોના કલસ્ટરની જમીનની મર્યાદા જે ૨૦ હેકટર હતી તે ઘટાડીને ૧૦ હેકટર કરવાનો મહત્વનો નિર્ણય કર્યો છે. જેનાથી રાજ્યના ખેડૂતોને વધુને વધુ ફાયદો થશે.

error: Content is protected !!